На маргините на самитот на Европската политичка заедница во Тирана, премиерот Христијан Мицкоски и неговиот британски колега Киир Стармер официјално обелоденија нов стратешки договор меѓу Македонија и Обединетото Кралство. Станува збор за историски чекор во односите меѓу двете земји, кој предвидува инвестициски циклус од дури 6 милијарди евра, главно насочени кон инфраструктурата, железничкиот и транспортниот систем, како и здравствениот сектор.
Премиерот Мицкоски попладнево потврди дека договорот е потпишан на ниво на влади и претставува резултат на неколкумесечни преговори. Тој истакна дека партнерството не вклучува одредби поврзани со прифаќање на одбиени баратели на азил, што беше предмет на шпекулации.
Премиерот Стармер во својата изјава најави дека со овој договор ќе се отворат нови поглавја во соработката и ќе се решаваат важни прашања кои се од заеднички интерес за двете држави.
Според поранешниот амбасадор на Македонија во Велика Британија, ова е договор кој ќе има сериозно влијание и врз евроинтегративниот процес на земјата. Тој оцени дека Владата треба мудро да ја искористи понудената помош и поддршка за да се забрза интеграцијата во ЕУ.
Директорот на ТИРЗ (Технолошко-индустриски развојни зони) во гостување на телевизија Сител го оцени договорот како историски и посочи дека тој ќе донесе големи и конкретни странски инвестиции во земјата.
Ова е трет стратешки партнерски договор што Македонија го потпишува, по оние со САД и Турција, што укажува на интензивирање на надворешната политика и стремеж за поголема меѓународна вклученост и економски развој.
