Владата на Република Македонија потпиша договор вреден 1,7 милиони евра за организирање на националното учество на светската изложба ЕКСПО 2027, што ќе се одржи во Белград. За реализацијата на овој значаен проект е ангажирано Здружението за културен и економски развој и поврзување „Јавна соба“ од Скопје, со претседател Александар Велиновски.
Договорот, склучен на 9 јули 2025 година, изнесува 106.044.240 денари (1.724.297 евра) и е објавен преку системот за јавни набавки. Потписник од страна на државата е генералниот секретар на Владата, Игор Јанушев.
Според договореното, „Јавна соба“ во наредните 30 месеци ќе биде задолжена за целосно осмислување и изведба на македонското саемско присуство – од дизајн на логото, архитектонски и визуелни решенија за павилјонот, до организација на културна програма, медиумска промоција и ангажирање на седум обучени промотери кои ќе престојуваат во Белград за време на изложбата. Проектот вклучува и свечено отворање на павилјонот, медиумски закуп во српски медиуми и видеодокументација на целиот процес.
ЕКСПО 2027 ќе се одржи од 15 мај до 15 август 2027 година и е прв ваков настан на Западен Балкан. Според најавите на организаторите, учество ќе земат 117 земји, а се очекуваат повеќе од четири милиони посетители во текот на 93 дена.
Светската изложба, која првпат се одржа во Лондон во 1851 година, има за цел да ги поврзе земјите и да ги промовира иновациите, културата и економскиот развој преку креативно и тематско претставување. Настанот во Белград претставува историска можност за Македонија да се позиционира на меѓународната сцена, како дел од глобалниот дијалог за иднината.
