Со 14 гласови „за“ и 7 „против“, Советот на Општина Карпош на денешната вонредна 69-та седница го усвои заклучокот со кој изрази противење на одлуката на Владата на Република Северна Македонија да ѝ ја одземе спортската сала „Наум Наумовски Борче“ – позната како сала „Партизан“ – која досега беше во трајно владение на општината.
Во обраќањето пред советниците, градоначалникот Стевчо Јакимовски посочи дека Владата ја донела одлуката без приложено образложение, што, според него, е сериозен пропуст и непочитување на законската процедура. Јакимовски потсети дека со одлука на претходната Влада во 2019 година, објектот бил впишан во Агенцијата за катастар како имот во трајно користење на Општина Карпош.
Општината, нагласи тој, во меѓувреме инвестирала околу 4 милиони денари за санирање технички недостатоци во салата, со што таа повторно станала функционална. Советот донел повеќе одлуки со кои делови од објектот се дадени на користење, некои со, а некои без надомест.
„Најмалку што можеше да направи Владата е да ја извести Општина Карпош и да отвори дијалог пред да донесе ваква одлука,“ изјави Јакимовски, нагласувајќи дека средствата за инвестициите се пари на граѓаните на Карпош.
Советниците истакнаа дека начинот на донесување на оваа одлука е непринципиелен и штетен, бидејќи е спроведен без консултации и без побарано мислење од локалната самоуправа. Со усвојувањето на заклучокот, Советот го задолжи градоначалникот и стручните служби да преземат понатамошни правни чекори пред надлежните институции, со цел да се заштити општинскиот интерес и јавниот имот.
