На денешниот митинг во Ново Село, во рамките на изборната кампања за локалните избори 2025 година, претседателот на ВМРО-ДПМНЕ, Христијан Мицкоски, изрази уверување дека граѓаните масовно ќе ја поддржат неговата партија и коалицијата, гласајќи за бројот 9. Тој истакна дека политичкиот противник започнал со негативна кампања, без да понуди конкретни проекти или визии за иднината. „Нашиот противник не понуди ниту еден проект, ниту стратегија. Тој сам вели дека ова раководство на СДСМ е континуитет на оној што 7 години ја пустошеше Македонија. Дали постои поголема инспирација за граѓаните да излезат на 19 октомври и да гласаат против тие политики?“ нагласи Мицкоски.
Мицкоски продолжи со критики кон министерот Венко Филипче, кој, според него, е продолжение на Заевовите политики кои го осиромашија народот. „Половина милион граѓани живеат со 150 денари на ден. Филипче без срам вели дека е континуитет на политиките на својот гуру Заев. Дали да зборуваме за пензиите кои се покачуваа за максимум 500 денари за 7 години? Сега, со покачувањето од ВМРО-ДПМНЕ, 350 илјади пензионери добија линеарно покачување од 6000 денари, а до април, вкупното покачување ќе биде 7000 денари за секој од нив. За нас, тоа значи многу и го олеснува животот,“ истакна Мицкоски.
Тој додаде дека за Филипче и Заев, зголемувањето на пензиите не значи ништо, бидејќи нивните јахти и хациенди вредат милиони. „За нив, 14 илјади денари не значат ништо, затоа што нивните имоти на Халкидики и во Дубаи вредат милиони. Тие се потсмеваат со маката на македонскиот народ,“ рече Мицкоски.
Мицкоски ги потенцираше и предавствата на СДС, споменувајќи ги националните интереси и распродажбата на Македонија. „Да се потсетиме на капитулантскиот договор со нашиот источен сосед и на францускиот предлог, кој ние го нарекуваме бугарски диктат. 15 пресуди од Стразбур стојат во некоја фиока и немаат абер за имплементација. Овие луѓе, мислејќи дека ќе останат на власт, влегоа во аранжмани без да водат сметка за македонците од другата страна на границата. На 19 октомври, важно е да заокружиме 9 за да победи Македонија.“
