На денешниот митинг во Вевчани, Христијан Мицкоски, претседателот на ВМРО-ДПМНЕ, изрази уверување дека Социјалдемократскиот сојуз ќе доживее уште еден изборен неуспех на предстоечите локални избори. Тој ја критикуваше изјавата на Венко Филипче, кој тврди дека нема да води негативна кампања, а во исто време, како што вели Мицкоски, ја злоупотребува трагедијата во Кочани.
Мицкоски истакна дека Филипче подготвува ново предавство кон Бугарија со т.н. црвени линии. „Тоа е всушност реалното лице на опозицијата која во најновите пазарџиски трикови сака и да спакува нов поклон за нашиот источен сосед. Тоа е подарок којшто тие го нарекоа Резолуција или црвени линии, после кој СДСМ сака, нормално, да изроди некоја нова отстапка на грбот на македонскиот народ, на грбот на македонските граѓани,“ рече Мицкоски.
Тој дополнително постави прашање за потребата од црвените линии, ако францускиот предлог бил толку добар и идентитетот заштитен. „Зошто ни требаат овие црвени линии, коишто се дел од т.н. резолуција на СДСМ? Одговорот лежи во тоа дека СДСМ, повторно, со трикови сака да направи некој нов бонбона бизнис, познат за нив како карактерна особина од минатото,“ нагласи Мицкоски.
На крајот, тој повика на масовно учество на изборите, нагласувајќи дека народот треба да ја изрази својата волја и да покаже дека владеењето не е само во рацете на тесни клики кои гледаат на владеењето преку призмата на наместени тендери.
