Премиерот Христијан Мицкоски денеска изрази жалење што родителите на трагично загинатите млади во кочанската дискотека „Пулс“ одбиле да се сретнат со него во Владата. Тој истакна дека е подготвен да отпатува во Кочани и таму да разговара со нив.
„Жалам за нивната одлука. Немам никаков проблем да заминам за Кочани и да се сретнам со родителите. Ќе направам сè што е во моја моќ за да им помогнам, колку што можам,“ изјави Мицкоски, додавајќи дека досега не добил официјална покана за средба во Кочани, но дека сега ја прифаќа иницијативата.
Изјавата доаѓа откако родителите на жртвите од трагедијата што се случи на 16 март оваа година, со писмено соопштение на 9 мај, одбија да се сретнат со премиерот во Владата. Како причина го наведоа доцнењето на поканата и нагласија дека сами го поканиле Мицкоски да дојде во Кочани, каде што средбата може да се организира на начин кој ним им одговара, имајќи предвид дека дел од нив не се во можност да патуваат поради последиците од настанот.
„Сум бил во Кочани и денот кога се случи трагедијата. Не сакам случајот да добие димензија на сензација или политички спектакл, иако некои од опозицијата се обидуваат токму тоа да го направат,“ рече Мицкоски.
Тој додаде дека, иако некои се обидуваат да добијат политички поени преку манипулација со трагедијата, тој останува на располагање за поддршка на семејствата и повика на деполитизација на случајот.
„Јас сум тука, подготвен сум да разговарам и да помогнам колку што можам, само за таа болка да биде барем малку олеснета,“ порача премиерот.
Во меѓувреме, вчера во Кочани се одржа петтиот протестен марш на семејствата и блиските на загинатите и повредените, кои повторно побараа правда — правична и неселективна.
