Студено утро ја зафати земјава, со најниски температури во планинските и источните делови. Најстудено беше на Попова Шапка, каде што термометрите измерија –7 степени, што е и најниска вредност регистрирана денеска.
Под нулата се разбудија и жителите на Берово и Маврови Анови со –4 степени, во Крушево беа измерени –3, а во Крива Паланка –2 степени. Во главниот град температурите се движеа околу нулата, додека најблага утринска клима имаше во југоисточниот дел од државата – во Гевгелија се измерени 3 степени над нулата.
Покрај студот, изминатото деноноќие донесе и значителни врнежи. Најмногу дожд наврна во Гевгелија – 26 литри на метар квадратен. Следуваат Демир Капија со 20 литри, како и Струмица и Маврови Анови со по 17 литри. Влажно време е регистрирано и во Скопје, Кавадарци, Берово, Велес и Тетово.
На планините веќе се формира стабилна снежна покривка. На Попова Шапка има околу 50 сантиметри снег, додека во Маврови Анови се измерени 14 сантиметри. Помала снежна покривка има и во Берово со 5, како и во Ѓуриште со 2 сантиметри.
Метеоролозите најавуваат продолжување на студениот период, со можност за нови врнежи и дополнително зголемување на снежната покривка на повисоките места.
