Газа, 14 мај 2025 (МИА) – Најмалку 48 лица, меѓу кои и 22 деца, загинаа синоќа во серија израелски воздушни напади врз куќи во северниот дел на Појасот Газа, соопшти индонезиска болница во Џабалија.
Нападите се случија еден ден откако Хамас ослободи израелско-американски заложник, по интервенцијата на САД и во момент кога американскиот претседател Доналд Трамп е во посета на Саудиска Арабија.
Израелскиот премиер Бенјамин Нетанјаху изјави вчера дека „нема начин“ Израел да ја прекине војната во Газа, со што ги разби надежите за прекин на огнот.
Израелската војска одби да коментира за нападите, но доцна синоќа ги предупреди жителите на Џабалија да се евакуираат поради воената инфраструктура на Хамас во регионот, вклучувајќи ги и ракетните лансери.
Во коментар објавен од канцеларијата на Нетанјаху вчера, премиерот рече дека израелските сили ќе го почнат планираното проширување на операцијата во рок од неколку дена и ќе влезат во Газа „со поголема сила за да ја завршат мисијата, што значи уништување на Хамас“.
Од Рената Пепељугоска Извор МИА
