Уште од пред неколку денови беше објавено дека овие локални избори се рекордни во поглед на бројот на кандидати за градоначалници и советници. Од вкупно обработените 9.793 кандидати и статистиките поврзани со нив може да се види уште еден раритет во поглед на статистиката.
Така на овие избори го имаме и највозрасниот кандидат. Се работи за кандидатот на советничката листа за советници за Општина Битола Цветанка Велјанова. Оваа кандидатка од редовите на Македонска Акција – МААК има 97 години. Вториот највозрасен кандидат е од истата политичка партија и се наоѓа на листата на советници на Велес. Тоа е Радмила Јанушевска која има 93 години.
Вкупно седум кандидати имаат над 90 години, па покрај погоре споменатите на листата највозрасни се и Томислав Маниќ кој има 92 години и се наоѓа на независната советничка листа за советници на Општина Центар на Горан Ѓуровски.
Љубица Олумчева има исто така 92 години и се наоѓа на листата за советници на Град Скопје предводена од политичката партија Твоја Партија. Драгица Стојановска со 91 година се наоѓа на листата на МААК за Кисела Вода, а Стојанка Тортевска од Твоја Партија со идентичен број на години се наоѓа на листата за советници на Град Скопје.
Интересен е податокот дека на листата за советници на Град Скопје на политичката партија Единствена Македонија се наоѓаат Трајан Ѓорчевски кој има 90 години и Ратка Ѓорчевска која има 89 години. Судејќи по презимето најверојатно станува збор за брачен пар.
