Вредноста на половните автомобили ја одредуваат повеќе фактори – од техничката состојба и редовното одржување, до староста и пазарните услови. Но, според најновата анализа на онлајн платформата Carwow, клучен показател кој најсилно влијае на цената е прејдената километража.
Carwow ги анализирал податоците за продажба на половни возила во периодот од 2022 до 2024 година и ги идентификувал клучните точки кога автомобилите најмногу ја губат својата вредност и кога е најисплатливо да се продадат или заменат.
Според податоците, вредноста на автомобилот почнува да паѓа веднаш штом ќе излезе од продажниот салон, а првиот значаен финансиски удар доаѓа при 15.000 километри, кога цената во просек се намалува за околу 22 проценти.
Најголемиот пад се случува околу 30.000 километри, кога возилото губи дополнителни 24 проценти од својата пазарна вредност. Доколку километражата достигне 100.000 километри, вредноста паѓа дури за 64 проценти, покажува истражувањето.
Следната критична точка е при 150.000 километри, кога автомобилот бележи уште еден просечен пад од 19 проценти, што го прави овој праг пресвртница по која вредноста опаѓа уште побрзо.
Истражувањето јасно покажува дека километражата не е само бројка на инструмент-таблата, туку еден од најважните показатели што директно ја одредува реалната пазарна цена на возилото.
