Повеќе од една година и четири месеци по неговото исчезнување, сè уште нема никаква официјална информација за судбината на Марк Јорис, 72-годишен државјанин на Белгија, кој исчезна во струшкиот регион.
Исчезнувањето било пријавено на 18 септември 2024 година, кога Јорис последен пат бил забележан во атарот на селото Лакајца, додека се движел по познатата планинарска рута High Scardus Trail. Денес е 15 јануари 2026 година, а потрагата по него сè уште нема резултат.
Според информациите објавени во периодот на исчезнувањето, Јорис имал планирано да ја мине трасата која води низ Вевчани, Охрид и Националниот парк Галичица, со завршница кај манастирот „Свети Наум“. Дополнително, од Министерството за внатрешни работи информираа дека неговата планирана рута опфаќала и делови од релацијата Охрид – Струга – Дебар (Битуше), општина Маврово и Ростуше, како и движење кон северниот дел на Албанија.
Без официјални нови информации
И покрај ангажманот на надлежните институции, како и вклучувањето на локални планинари и граѓани во потрагата во првите месеци, досега нема објавени нови информации или траги што би укажале каде се наоѓа исчезнатиот планинар.
Според официјалната информативна табла на МВР за исчезнати лица, Марк Јорис е роден на 8 јуни 1952 година, висок е 182 сантиметри, со слаба градба. Во моментот на исчезнувањето бил облечен во сиви панталони и кафеава блуза и носел комплетна планинарска опрема, вреќа за спиење и стап за планинарење. Тој зборува англиски јазик, но не зборува македонски.
Апелот останува отворен
Надлежните институции и понатаму упатуваат апел до јавноста – доколку некој има каква било информација, сознание или забележал нешто што би можело да биде поврзано со исчезнувањето на Марк Јорис, тоа веднаш да го пријави во најблиската полициска станица.
Случајот останува отворен, а надежта дека ќе се дознае што се случило со белгискиот планинар сè уште не е згасната.
