Полицијата во текот на изминатото деноноќие приведе 16 возачи низ државата поради безобѕирно управување со моторни возила, информираат од Министерството за внатрешни работи.
Најголем дел од нив, дури 11, управувале возило без да поседуваат возачка дозвола, додека двајца биле зад волан и покрај тоа што имале активна забрана за управување. Кај тројца возачи било утврдено дека управувале возило под дејство на алкохол.
Во Скопје, пет лица биле затекнати како возат без возачка дозвола, додека вакви случаи биле регистрирани и во повеќе градови низ државата, меѓу кои Гостивар, Велес, Росоман, Чашка, Македонски Брод и Градско.
Во меѓувреме, во Кавадарци и Демир Хисар биле откриени возачи кои управувале возило и покрај тоа што имале изречена забрана, додека случаи на возење под дејство на алкохол биле евидентирани во Неготино, Свети Николе и на граничниот премин Блато.
Од МВР информираат дека по целосно документирање на случаите, против сите сторители ќе бидат поднесени соодветни кривични пријави.
Воедно, од полицијата упатија апел до сите учесници во сообраќајот да ги почитуваат правилата и прописите, да не управуваат возило без дозвола, под забрана или под дејство на алкохол, со цел да се зголеми безбедноста на патиштата.
