Од денеска официјално стапува на сила обврската за задолжително користење на зимска опрема за сите моторни возила, мерка што ќе важи до 15 март следната година. Надлежните апелираат возачите навреме да ги подготват своите возила за зимски услови, со цел да избегнат казни, но и да придонесат кон побезбедно возење во услови на снег и мраз.
Според правилата, возилата до 3.500 килограми мора да бидат опремени со зимски гуми на сите тркала со длабочина на шарата од најмалку 4 милиметри, или пак со летни гуми со иста минимална длабочина, но во тој случај возачите задолжително мора да носат синџири за снег.
За возила со погон на сите тркала (4×4), пропишана е длабочина на шарата од најмалку 6 милиметри за зимските гуми, или пак најмалку 4 милиметри за летните, повторно со задолжително носење синџири.
Возилата над 3.500 килограми мора да користат зимски гуми со длабочина од 6 милиметри на погонските тркала, или алтернативно летни гуми со минимум 4 милиметри, со задолжително користење или носење синџири за снег.
Покрај ова, автобусите и товарните возила кои немаат можност да користат синџири, мора да имаат со себе прирачен алат, како што е лопата, за да можат да реагираат во услови на снег и замрзнат пат.
Надлежните институции потсетуваат дека контролите ќе бидат засилени, особено на планинските превои и критичните делници, и дека санкциите за непочитување на обврските се значителни. Возачите се повикуваат навреме да ја подготват зимската опрема и да ги проверат гумите пред да се вклучат во сообраќајот.
