Замислете секој ден шест месеци да одите на работа и секој ден да добивате казна за брзо возење – без притоа да бидете известени навреме. Токму тоа му се случило на еден Италијанец од регијата Пијемонт.
Истата камера го снимала дури 100 пати за време на неговото секојдневно патување, а кога властите ги собралe сите казни, вкупниот износ го шокирал: 28.000 евра, пренесува италијанскиот медиум „Il Nazionale“.
Мажот, Андреа Ферето, 40-годишен обезбедувач во супермаркет во градот Тортонa, секој ден патувал од дома до работа два пати на ден.
„Шест месеци секој ден се возев на работа“, изјавил тој за медиумите. Кога ја добил првата казна, помислил дека е грешка и се јавил во полиција – но му било потврдено дека сите казни се валидни.
Ферето тврди дека камерата е поставена на проблематична локација – во свиок и скриена зад триметарска жива ограда. Тој се повикува на одлука на италијанскиот Касационен суд според која контролите на брзина мора да бидат јасно обележани и однапред најавени. Дополнително, се жали дека камерата можеби не била правилно одобрена во 2021 година. Но, неговите жалби не биле прифатени.
Со месечна плата од само 1.100 евра, тој не можел веднаш да го плати износот. Како дополнителен проблем, му се заканувало одземање на автомобилот и скутерот.
„Сега ќе се обидеме да најдеме начин да започнеме со отплата,“ изјавил тој за „Il Nazionale“.
