Албанија се соочува со сериозни проблеми поради невремето кое ја зафати земјата, проследено со силен ветер и обилен дожд. Овие неповолни временски услови доведоа до прекин на воздушниот, поморскиот и дел од патниот сообраќај. Според информациите од Eeuronews.al, „Силното невреме што ја погоди Албанија, предизвика привремен прекин на летовите на меѓународниот аеродром во Тирана. Пистата е погодена од силен ветер и дожд, што го оневозможува нормалното функционирање на летовите. Властите ги прекинаа летовите додека не се подобрат временските услови.“
Невремето, кое предизвика големи бранови, влијаеше и на поморскиот сообраќај. Во пристанишниот град Драч, како и во Тирана и други делови на земјата, силниот ветер предизвика пад на дрвја и прекин во снабдувањето со електрична енергија. Според Albanian Post, во Тирана досега се пријавени 20 повредени лица.
Министерството за внатрешни работи упати апел до граѓаните да бидат внимателни и да ги почитуваат сообраќајните правила. Тие советуваат да се избегнува излегување од домовите без итна потреба, бидејќи „улиците се преполни со вода и паднати дрвја, гранки и лимени покриви.“
„Вработените во сите локални полициски дирекции, противпожарните бригади и локалните власти се на терен, за да обезбедат помош и поддршка. Во случај на потреба јавете се на бесплатниот телефонски број 112,“ се наведува во апелот на властите. Според медиумите, поради невремето, голем број туристи го напуштаат крајбрежјето.
