НЛБ Банка излезе со реакција на информациите кои се појавија во медиумите, а кои се однесуваат на новиот Тарифник што ќе стапи на сила од 23 јуни оваа година. Во соопштението се објаснува дека најавеното воведување на паричен надоместок за користење на мобилната апликација мКлик било погрешно интерпретирано.
Банката појаснува дека новиот надоместок не се однесува на наплата за секој поединечен увид во состојбата на сметките, туку на месечен надоместок од 20 денари за целиот Light пакет. Овој пакет ги опфаќа дебитната картичка и мобилната апликација НЛБ мКлик, која им овозможува на клиентите да имаат увид во сите свои сметки на едно место.
„Овој надоместок се однесува на целиот пакет и нема да се наплаќа поединечно за секој преглед на состојба на сметките, како што беше наведено во дел од објавите,“ се наведува во соопштението на Банката, која посочува дека целта е да се осигура точна информираност на клиентите.
НЛБ Банка дополнително напомнува дека континуирано инвестираат во развојот и безбедноста на своите дигитални услуги, со фокус на обезбедување сигурно, брзо и супериорно клиентско искуство. Инвестициите во дигитализацијата им овозможуваат на клиентите да користат напредни алатки кои штедат време и го олеснуваат секојдневното управување со финансии, преку најсовремени технолошки решенија со високо ниво на безбедност.
