Во Министерство за внатрешни работи информираат дека во изминатиот период до нив пристигнале повеќе пријави од граѓани кои добиле сомнителни електронски пораки, во кои лажно се претставува името на директорот на Бирото за јавна безбедност, Александар Јанев.
Во пораките, примачите се заплашуваат дека наводно се предмет на кривични истраги за сериозни и целосно измислени кривични дела, како што се детска порнографија, педофилија и трговија со дрога. Од нив се бара во рок од 24 часа да се јават во полициска станица или да испратат повратен е-маил.
Според МВР, целта на ваквите пораки е класична измама, со која измамниците се обидуваат да ги натераат граѓаните да се регистрираат преку електронска пошта и да ги достават своите лични податоци, кои подоцна може да бидат злоупотребени.
Од Министерството потенцираат дека станува збор за лажни пораки, кои не се испратени од БЈБ, МВР, ниту од Одделението за сајбер криминал. Истражни постапки и покани за разговор со граѓани, како што нагласуваат, никогаш не се вршат преку електронска пошта.
Дополнително, МВР укажува дека овие пораки често содржат очигледни јазични грешки, лош превод и нелогична содржина, што е уште еден јасен показател дека станува збор за обид за измама.
Од МВР апелираат до граѓаните да бидат особено внимателни, да не ги отвораат ваквите пораки, да не стапуваат во контакт со испраќачот и никако да не споделуваат лични податоци. Исто така, предупредуваат да не се отвораат линкови и прилози од непознати испраќачи, со цел да се избегне инсталирање на малициозен софтвер и компромитирање на компјутерските системи.
