Државната изборна комисија (ДИК) денеска не успеа да усвои упатство за пополнување на образците за листи на кандидати за советници во општините и во Градот Скопје. Предлогот беше блокиран откако членката на Комисијата, Дитмире Шеху, побара одлуката да се донесе со консензус, повикувајќи се на одредби од Изборниот законик.
Според Шеху, упатството се однесува на немнозинските заедници, што значи дека е потребна едногласна поддршка. Таа изрази сомнеж во легитимноста на документот и укажа дека не може да се темели на владина одлука за намалување на бројот на советници според резултатите од пописот, туку исклучиво на Законот за локална самоуправа.
Претседателот на ДИК, Борис Кондарко, потсети дека упатството за локалните избори во 2021 година било донесено врз основа на одлука од 2004 година за бројот на советници. Сепак, по денешното гласање – пет члена беа „за“, а двајца „против“ – не беше постигнат консензус.
Кондарко истакна дека член 31 од Изборниот законик му овозможува на Шеху да побара правно мислење од правната служба на ДИК. По добивањето на тој став, Комисијата повторно ќе расправа за оваа точка.
На 130. седница, освен ова прашање, ДИК донесе и неколку други одлуки поврзани со претстојниот изборен процес, меѓу кои и усвојување упатство за набљудување на изборната постапка.
