Министерството за економија објави нова мерка која ќе овозможи вработување на 200 невработени лица во компании што инвестираат во зелени технологии и обновливи извори на енергија. Оваа иницијатива е дел од оперативниот план за вработување за 2025 година, а компаниите од приватниот сектор ќе можат да добијат неповратни грантови во износ од 250.000 до 750.000 денари.
Според соопштението од владата, целта на мерката е да се вклучат активни баратели на работа во микро, мали и средни претпријатија кои се фокусирани на зелени технологии, производи и процеси. Финансиската поддршка ќе се доделува во зависност од бројот на новоотворени работни места: 250.000 денари за едно ново вработување, 500.000 денари за две нови вработувања и 750.000 денари за три нови вработувања.
Компаниите ќе можат да ги искористат овие средства за набавка на нова опрема, машини, софтвер и лиценци, како и материјали за енергетска ефикасност. Право на учество имаат микро, мали и средни претпријатија од приватниот сектор, со приоритет за оние од секторите како преработувачка индустрија, земјоделство, шумарство, водостопанство, градежништво и транспорт.
Јавниот повик за пријавување е отворен до 1 септември 2025 година, а заинтересираните работодавачи можат да се пријават во Центрите за вработување секој работен ден од 08:00 до 14:00 часот.
