Крива Паланка, 31 јули 2024 (МИА) – Во градскиот парк во Крива Паланка е поставена нова урбана опрема, нови дваесет клупи за седење и десет стилизирани корпи за отпадоци.
-Градскиот парк и плоштадот се место каде што граѓаните од сите возрасти можат да уживаат и да се рекреираат, особено во периодот на летните денови кога и програмата на манифестацијата „Крива Паланка – Град на културата“ и „Кривопаланечко културно лето“ нудат голем број настани што се реализираат на градскиот плоштад и летната сцена. Во паркот минатата недела за дечињата и најмладите жители на општината беше уредено ново детско катче со мултифункционален детски реквизит, а во рамки на проектот што се реализираше на површина од околу 180 метри квадратни, поставена е и урбана опрема. Поставени се нови 20 клупи, надополнувајќи го капацитетот за одмор, релаксација и уживање во прекрасниот амбиент на паркот, а за одржување на високото ниво на хигиена поставени се и нови десет корпи за отпадоци, велат од Општината.
Опремата е поставена во склоп на проектот за уредување детското катче со вкупна вредност од 2.100.000 денари, финансии обезбедени од Буџетот на општината преку Развојната програма на Општина Крива Паланка за 2024 година, информира службата за комуникација со јавност во Општина Крива Паланка.
Постојните дваесет клупи за седење што беа демонтирани од градскиот парк се поставени долж мајор коритото на Крива Река, во кејот, по течението на реката.
-Со ова локалната самоуправа на општината ги продолжува заложбите за модерна, урбана и уредна општина, нагласија од Општината.
Од Ирена Белешковска, Крива Паланка Извор МИА
