Fiat работи на неколку нови модели, а извршниот директор на брендот, Оливие Франсоа, најави дека во следните 18 месеци ќе дебитираат три нови возила: Giga Panda, новиот Fastback и пикапот Grande Panda. Иако се очекуваше новиот SUV да биде претставен средината на годината, до сега не се знае што точно се случува со плановите на Fiat.
Италијанските медиуми известуваат дека новиот извршен директор на Stellantis, Антонио Филоса, направил некои промени во плановите на Fiat, што е причина за тишината која трае веќе неколку месеци. Сепак, не е јасно што точно вклучуваат овие промени. Иако шпионските снимки на Giga Panda сè уште не се појавиле, веќе имало неколку „блиски средби“ со новиот модел Fiat Fastback. Некои веруваат дека Fastback, кој првично требаше да дебитира како втор, на крајот би можел да се појави прв, веројатно до крајот на годината, како наследник на Fiat Tipo.
Во меѓувреме, на социјалните мрежи се појави дискусија за името на новиот SUV. Првично, се спомнуваа имињата Giga Panda или Pandissima, но сега во фокусот е името Grizzly. Оваа опција веќе беше разгледувана во минатото, а Оливие Франсоа изјави дека следниот Fiat SUV би можел да биде именуван по животно. Поради тоа што моделот ќе биде поголем од Grande Panda, која се произведува во Крагујевац, се разгледуваат поголеми животни. Најпопуларните предлози се Fiat Grizzly или Fiat Orso (Медвед).
Директорот Франсоа исклучи можноста малиот кросовер да се вика Fiat Multipla, нагласувајќи дека ова име би требало да се користи само кога Fiat ќе има проект за нов минивен достоен за легендарниот модел. Изборот на името Grizzly за новиот Fiat се базира на три причини: прво, името потсетува на животинскиот свет, особено на семејството на мечките, симболизирајќи сила и природа; второ, Grizzly означува робусност и моќ, што е совршен опис за современ SUV; и трето, името е лесно за препознавање и изговор, дури и во странство, што е важно за глобалната продажба на моделот.
Што се однесува до дизајнот, очекувањата се дека предниот дел на двата модели ќе потсетува на Grande Panda, задржувајќи познатите, робусни линии, додека задните делови ќе се разликуваат. Fastback ќе има благо наклонето задно стакло, елегантно, но не и претерно, додека Grizzly, или како и да се вика новиот SUV, ќе биде со значителни димензии, правејќи го вистински XXL член на семејството Panda. Во однос на моторите, се очекува дека двата модели ќе добијат хибридна единица со 1.2 PureTech троцилиндричен мотор кој произведува 136 КС и електричен мотор од 29 КС, за вкупно 145 КС. Се споменува и електрична верзија со 113 КС и батерија со капацитет поголем од 44 kWh.
