Кабул, 15 јануари 2025 (МИА) – Повеќе од 500.000 деца во Авганистан оваа година се изложени на ризик од неухранетост, предупредија денеска Обединетите нации (ОН).
ОН ги наведуваат екстремните климатски услови кои ја „ограничиле способноста на луѓето да ги прехранат своите семејства“ како една од причините за оваа алармантна ситуација.
Според последниот извештај на Канцеларијата на ОН за координација на хуманитарни прашања (OCHA), на речиси половина од авганистанското население, околу 22,9 милиони луѓе, оваа година ќе им биде потребна хуманитарна помош за да се задоволат хроничните и акутни потреби.
Кревката економија на Авганистан, природните катастрофи и шокови предизвикани од климатските промени и политичката нестабилност во земјата и регионот стојат на патот за закрепнување од деценискиот конфликт, се вели во извештајот.
Откако исламистичките талибанци ја презедоа власта во земјата во август 2021 година, Авганистан нема пристап до своите девизи во западните банки, што дополнително ја влошува економската криза во земјата. Стапките на невработеност и сиромаштија погодуваат околу 48 отсто од населението, предупредуваат ОН.
Земјата е многу ранлива на катастрофи предизвикани од климатските промени. Во 2025 година се очекуваат уште поразорни поплави од претходните, кои ќе уништат голем број домови и земјоделско земјиште, додека заедниците се раселени.
Во август 2023 година, талибанците побараа враќање на седум милијарди долари од Централната банка на Авганистан замрзнати во странство.
Од Марија Спасовска Извор МИА
