Драматичен инцидент се случил вчера попладне во Скопје, кога возач под силно дејство на алкохол предизвикал сообраќајна незгода и оштетил две паркирани возила.
Според информациите од полицијата, станува збор за 46-годишен скопјанец кој околу 15:35 часот, управувајќи автомобил „шевролет авео“ на улицата „Бранислав Нушиќ“, удрил во паркирана „хонда“ и „опел астра“.
По интервенцијата на полициските службеници, возачот бил подложен на алкотест, при што биле утврдени дури 4,01 промили алкохол во крвта – ниво кое се смета за исклучително опасно и ризично за управување со возило.
Лицето било лишено од слобода во 18:40 часот и задржано во полициска станица по насоки на јавен обвинител, додека возилото му било одземено.
По целосно документирање на случајот, против него ќе биде поднесена кривична пријава за „безобѕирно управување со моторно возило“, согласно член 297-а од Кривичниот законик.
