Полицијата во Битола открила измамничка шема во која повозрасни граѓани биле лажени со приказни за наводни сообраќајни несреќи на нивни блиски, по што им биле барани пари за итно лекување.
СВР Битола, во координација со Одделот за криминалистичка полиција при Бирото за јавна безбедност, поднесе кривична пријава до Основното јавно обвинителство Битола против 67-годишниот Д.Н. од Битола и уште две засега непознати лица. Тие се сомничат за кривично дело „измама“.
Според истрагата, осомничените телефонски контактирале со постари лица, претставувајќи се како лекари. Со лажни информации дека нивни роднини доживеале тешка сообраќајна несреќа и дека е неопходна итна операција, од нив барале пари.
На ваков начин биле измамени 84-годишна жена и 83-годишен маж од Битола, од кои биле одземени вкупно 20.000 евра.
Обидот за нова измама бил спречен на 27 февруари годинава, кога 78-годишна жителка на битолско село го пријавила случајот во полиција. По преземените оперативни мерки, полициските службеници го затекнале и го лишиле од слобода Д.Н. во моментот кога дошол да ги подигне парите.
Од МВР информираат дека осомничениот во целост ги признал делата, по што против него е поднесена кривична пријава, додека се преземаат активности за идентификација на другите две лица.
