Некогаш еден од најпопуларните онлајн платформи за инспирација, особено меѓу женската публика, Pinterest најави значајно кратење на работната сила. Компанијата планира да отпушти до 15% од своите вработени, со цел да ги пренасочи ресурсите кон развој на алатки базирани на вештачка интелигенција.
Иако од Пинтерест тврдат дека станува збор за стратегија насочена кон долгорочно зајакнување на бизнисот, пазарот реагираше негативно. По објавата, акциите на компанијата забележаа пад од речиси 10%, што укажува на скептицизам кај инвеститорите.
На крајот на минатата година, Пинтерест имал 5.205 вработени, што значи дека планираните отпуштања би можеле да опфатат помалку од 780 работни места. Освен намалување на бројот на вработени, компанијата најави и затворање на помали канцеларии отворени преку претходни аквизиции.
Аналитичарите предупредуваат дека инвеститорите засега не гледаат јасна корист од ваквиот потег. Според проценките на eMarketer, без конкретен план за зголемување на приходите и јасно дефинирани заштеди, ориентацијата кон вештачка интелигенција повеќе личи на одбранбена мерка отколку на вистински стратешки исчекор.
Во меѓувреме, Пинтерест се соочува со силна конкуренција на пазарот за дигитално огласување, пред сè од TikTok и платформите на Meta – Facebook и Instagram – кои агресивно инвестираат во автоматизација и AI алатки за огласувачи. Компанијата веќе ги воведе Pinterest Assistant за персонализирани препораки и Performance+ систем за автоматизација на огласните кампањи, но очигледно тоа не е доволно за да ги увери инвеститорите во стабилен раст.
Од компанијата најавија дека трошоците за реорганизација ќе изнесуваат меѓу 35 и 45 милиони долари пред оданочување, а процесот треба да заврши до крајот на третиот квартал оваа година.
Овој потег е дел од поширок тренд во технолошката индустрија. Според податоците на Layoffs.fyi, во текот на 2025 година повеќе од 123.000 вработени останале без работа во 269 технолошки компании, при што вештачката интелигенција сè почесто се наведува како причина за отпуштања и реорганизации.
