Кина одлучи да ја прекине антимонополската истрага против компанијата Google, во време кога преговорите помеѓу Пекинг и Вашингтон за TikTok и Nvidia стануваат се поинтензивни, во контекст на растечките тензии помеѓу двете земји. Овој потег укажува на стратегиска промена од страна на кинеските власти – фокусот на регулаторите се префрла на Nvidia, која се користи како инструмент во трговските преговори со САД, додека завршувањето на истрагата против Google испраќа сигнал за флексибилност кон Вашингтон, пренесува Reuters, повикувајќи се на Financial Times.
Кинеската Државна управа за регулација на пазарот, која ја започна истрагата против Google во февруари, сега одлучи да ја прекине. Компанијата Google не сакаше да коментира за оваа одлука, а ниту кинеските регулаторни тела или Државниот совет не одговорија на барањата за информации од новинарите. Претходно, регулаторот укажа на сомневања за кршење на кинескиот антимонополски закон од страна на Google, но без да наведе конкретни детали за наводните прекршоци.
Според извори, Google сè уште не е официјално известен за одлуката за прекин на постапката. Во исто време, Кина на почетокот на неделата ја обвини компанијата Nvidia за кршење на антимонополскиот закон, по завршувањето на прелиминарната истрага за нејзините деловни практики. Во последните шест месеци, двете земји разменуваа удари – претседателот на САД, Доналд Трамп, воведе високи царини на кинеските производи, кои подоцна ги намали на 30%, и закани со затворање на TikTok, додека Кина возврати со контрецарини од 10% и покрена антимонополски истраги против американски компании, сигнализирајќи за зголемена регулаторна контрола.
