Јосип Јошка Броз, внукот на некогашниот претседател на СФРЈ Јосип Броз Тито, почина на 78-годишна возраст. Веста ја потврди српскиот министер за внатрешни работи Ивица Дачиќ.
„Со неверување ја примив веста дека вечерва нè напушти мојот пријател Јошка Броз, внукот на Тито и член на Главниот одбор на Социјалистичката партија на Србија. Со него си заминува дел од едно време, а доаѓа обврска за младите генерации да го чуваат споменот и сеќавањето на него,“ напиша Дачиќ.
Јошка Броз беше поранешен српски политичар и основач на здружението на граѓани „Јосип Броз Тито“, формирано во 2005 година.
Роден е во Белград во 1947 година. По разводот на неговите родители, Жарко Броз и Тамара Вегер, кога имал само три години, со сестра му Златица се преселил да живее кај својот дедо Тито и неговата сопруга Јованка.
По основното образование, Броз се запишал во гимназија, но го повторил првиот разред. Работел како шумар и металостругар, а потоа станал придружник на Тито во лов и надзорник на неговите ловишта. Како милиционер во Антидиверзантскиот вод, се грижел за безбедноста на Тито до неговата смрт во мај 1980 година.
Подоцна, Јошка Броз работел како угостител во Белград, каде што ги водел рестораните „Чубурска липа“ и „Тито“.
Неговата политичка активност предизвика бројни реакции. Минатата година тој ги повика земјите-членки на Движењето на неврзаните да гласаат против резолуцијата за Сребреница во ОН – повик што беше игнориран, бидејќи резолуцијата беше усвоена.
