Хосе „Пепе“ Мухика, некогашен герилец и поранешен претседател на Уругвај, почина на 89-годишна возраст, објави актуелниот претседател на земјата, Јаманду Орси, на социјалната мрежа Х.
„Со длабока тага ја соопштуваме смртта на нашиот другар Пепе Мухика. Ти благодариме за сè што ни даде и за длабоката љубов кон својот народ,“ напиша Орси.
Муџика го водеше Уругвај како претседател од 2010 до 2015 година, откако ги убеди гласачите дека неговото радикално минато е зад него. Иако беше еден од лидерите на левичарската герилска група „Тупамарос“ во 1960-тите и 1970-тите, Муџика се трансформираше во симбол на скромност и социјална правда.
Познат по својот аскетски начин на живот, живееше на мала фарма во предградие на Монтевидео, каде одгледуваше цвеќиња со својата сопруга, Луција Тополански. Наместо да живее во претседателската резиденција, возеше стара „Фолксваген Буба“, одбиваше формална облека и често ручаше во обични ресторани. Еднаш дури и одби милионска понуда од шеик кој сакал да ја купи неговата „Буба“.
Во политиката беше либерален и прогресивен. Како претседател, го потпиша законот за легализација на истополовите бракови, дозволи абортус во рана бременост и ја поддржа легализацијата на продажбата на марихуана – чекори што го вброија меѓу најлибералните лидери на Јужна Америка.
Во едно интервју во 2024 година изјави: „Проблемот е што светот го водат стари луѓе кои заборавиле какви биле кога биле млади.“
Мухика беше избран за претседател на 74 години, со 52% од гласовите, и покрај загриженоста за неговото минато и возраст. Поранешен член на марксистичките „Тупамароси“, тој учествувал во вооружени конфликти, бил ранет со шест куршуми, двапати бегал од затвор и поминал речиси 15 години зад решетки, најголемиот дел во време на диктатурата (1973–1985), кога во земјата беа убиени околу 200 лица, а илјадници беа затворени.
По враќањето на демократијата во 1985 година, Мухика повторно се активираше во политиката, стана министер за земјоделство во владата на Табаре Васкез и подоцна беше негов наследник на функцијата претседател.
Мухика останува запаметен како исклучителна личност која ги одбиваше привилегиите на моќта, живееше скромно и се бореше за обичниот човек.
