Во пожарот кој во саботата го зафати главниот производствен погон на Макпрогрес причинета е милионска штета, а уште поголема ќе биде социо-економската штета, особено поради фактот што во оваа компанија работат 500 лица од Виница и околината, а самата компанија има и голем импакт врз БДП на земјата.
Брендот Винчини е синоним за Макпрогрес, но покрај овој бренд на благи производи компанијата поседува и шест други.
Во 1998 година компанијата го лансираше брендот Сончева Долина. Се работи за бренд под чие име се продаваат пакувани зрнести производи како што се ориз, леќа, пченица, грав, пуканки, зачини, сол итн. Производите на овој бренд ќе бидат и натаму достапни поради тоа што се произведуваат односно пакуваат во друг производствен погон.
Натура е другиот, релативно понов бренд. Зад овој бренд компаниајта продава здрава храна. Така низ малопродажните објекти ширум Македонија под препознатливиот бренд Натура може да се најдат мусли, житни снегулки, корн флекс, овесни оброци, семиња, сушено овошје, експандирани житарки, овест, оризови галети итн.
Брендот Армониа во своето портфолио вклучува најразлични грицки. Фантасиа исто така е бренд зад кој стои компаниајта Макпрогрес. Под овој бренд се произведуваат и продаваат најразлични производи наменети за подготовка на десерти.
По Винчини, најзвучен друг бренд е Дониа. Се работи за бренд под чие име се произведуваат и продаваат повеќе видови на благи производи. Овој бренд се најде во портфолиото на Макпрогрес откако пред неколку години ја купија прилепската фабрика. Производите на овој бренд и натаму ќе останат достапни во малопродажните објекти од причина што се произведуваат во Прилеп.
Винаријата Кршла е седмиот и најнов бренд во портфолиото на Макпрогрес.
Голем дел од производите на компанијата и натаму ќе останат достапни во малопродажните објекти низ Република Македонија. Со купување на истите може да дадете поддршка на компанијата во надминување на проблемите со кои се соочува.
