Бугарскиот претседател Румен Радев во вечерашното обраќање до нацијата соопшти дека утре официјално ќе поднесе оставка од функцијата шеф на државата. Радев заминува точно една година пред истекот на мандатот, што отвора нова политичка неизвесност во земјата.
По неговото повлекување, функцијата претседател привремено ќе ја преземе потпретседателката Илијана Јотова, која ќе има уставна обврска да именува службена влада и да распише предвремени парламентарни избори.
Во своето излагање, Радев потсети дека граѓаните двапати му ја довериле функцијата – првпат во 2016 година и повторно во 2021 година – со мандат да работи во интерес на државата. Според него, во изминатите девет години, Бугарија го заокружила процесот на европска интеграција, при што нагласи дека заслуга имаат и редовните и привремените влади.
Радев истакна дека Бугарија денес е членка и на Шенген-зоната и на Еврозоната, што, според него, претставува историски исчекор за државата.
Иако директно не најави формирање политичка партија, ниту учество на претстојните избори, бугарските медиуми оценуваат дека неговото обраќање остава простор за такво сценарио. Според дел од анализите, евентуалната партија предводена од Радев би можела да одигра значајна улога, па дури и да оствари победа на новите парламентарни избори.
Румен Радев е петтиот демократски избран претседател на Бугарија. Редовните претседателски избори треба да се одржат кон крајот на годинава, а новоизбраниот шеф на државата се очекува да положи заклетва во јануари 2027 година.
