Вашингтон, 3 април 2025 (МИА) – Тимот на Мајк Волц во Националниот совет за безбедност (НСЦ) редовно имал разговори на апликацијата Сигнал во процесот на координација на официјалната работа за прашањата за национална безбедност, вклучувајќи ги Украина, Кина, Газа, Блискиот Исток, Африка и Европа, потврдија четири лица кои самите биле додадени во разговорите на Сигнал.
Двајца од тие четворица изјавиле дека имаат директно познавање на најмалку 20 вакви разговори, а сите четворица тврдат дека присуствувале на некои дискусии за чувствителни државни прашања, објави Политико.
-Волц го воспостави целиот процес на комуникација на НСЦ преку апликацијата Сигнал, вели еден од четирите анонимни извори на порталот. Ветераните претставници на националната безбедност предупредија дека оваа практика потенцијално ги прекршува прописите за заштита на чувствителните информации за националната безбедност од странски противници, но исто така ги крши федералните закони за водење на официјални владини записи бидејќи разговорите автоматски се бришат.
-Вообичаено беше да се започнуваат разговори на која било тема за национална безбедност, рече еден од учесниците во разговорот, додавајќи дека групите често вклучуваат членови на кабинетот и високи функционери.
Портпаролот на НСЦ Брајан Хјуз изјави дека Сигнал не е забранет на владините уреди, дека некои агенции автоматски ја инсталираат оваа апликација на телефоните на своите вработени, нагласувајќи дека владините службеници ја користеле апликацијата за време на претходните администрации на Бајден и Трамп.
Ниту еден од четворицата неименувани извори не потврди дека знаел дека е споделена доверлива информација, но сите се согласија дека објавите за групни разговори содржат чувствителни детали за активностите за национална безбедност.
„Вашингтон пост“ објави дека Волц и другите членови на НСЦ користеле комерцијална е-пошта во сопственост на Alphabet Inc. за да водат владина работа само една недела откако безбедносните процедури на администрацијата на Трамп беа под двопартиска критика за користење на апликацијата Сигнал за координирање на воените дејствија во Јемен.
Помошник на Волц користел приватна е-пошта за да сподели информации кои вклучуваат чувствителни воени позиции и моќни системи за оружје поврзани со неодреден тековен конфликт, објави Вашингтон пост, повикувајќи се на достапни владини документи и тврдења на тројца неименувани американски функционери.
Волц добил помалку чувствителни, но сепак доверливи информации на неговата лична е-пошта, вклучувајќи го и неговиот дневен распоред и други деловни документи, според весникот.
Од Марија Спасовска Извор МИА
