Полот и родот се биологија, а не идеологија!

6 април 2024 година, Скопје, Македонија – Светскиот Македонски Конгрес (СМК) и натаму за трајни морални вредности на човештвото и општеството ги смета бракот како заедница меѓу еден маж и една жена, семејството, верата, нацијата и државата!

СМК во духот на овие трајни морални вредности на човештвото и општеството бара воспитание и образование на децата и следните поколенија!

СМК го отфрла донесувањето на закон за родовна еднаквост со кој престанува да важи актуелниот закон за еднакви можности меѓу жените и мажите, бидејќи е во спротивност со трајните морални вредности на човештвото и општеството!

СМК за валиден го смета законот за еднакви можности меѓу жените и мажите!

СМК ја поддржува секоја превенција и борба против насилството врз жената и семејното насилство, но ја отфрла Конвенцијата на Советот на Европа за спречување и борба против насилство врз жените и семејното насилство, позната како Истанбулска конвенција од 2011 година поради родовата (џендер) идеологија со неконвенционалната дефиниција на машкиот и женскиот род, независно од биолошкиот машки и женски пол, што може да се менува според волјата на човекот.

За македонското општество: Машкиот пол е машки род, женскиот пол е женски род, така било, така е, така и ќе остане, полот и родот се биологија, а не идеологија!

Врз основа на Универзалната Декларација за човековите права и Конвенцијата за правата на децата на Обединетите Нации, со кои се гарантира право на родителите да го избираат видот на образованието и воспитанието на своите деца во согласност со нивните религиозни, филозофски и педагошки убедувања, СМК бара дополнување на Законот за заштита на децата со забрана во воспитно-образовните установи и во јавноста за деца под 18-годишна возраст:

– на секоја јавна промоција на сексуалната ориентација, која е во спротивност со трајните морални вредности на човештвото и општеството, бидејќи тоа не претставува демонстрација на правата и слободите на сексуалните малцинства, туку дискриминација на правата и слободите на децата и на мнозинството,

– на секое предавање и промоција за промена на полот, за сексуалната ориентација и за родовата идеологија за родот независно од полот, освен за полот при раѓањето!

СМК потсетува дека во Македонија се почитува приватноста на личноста, хомосексуалноста е декриминализирана, а сексуалната ориентација не е стигматизирана, но за неприфатлива ја смета секоја манифестација на сексуалните малцинства со која се врши повреда на чувствата, вознемирување и дискриминација кон верските заедници и нивните верници, како и кон моралните норми на мнозинството, во спротивност на демократијата и внатрешниот правен поредок на државата Македонија!