7 февруари 2025 година, Куманово, Македонија – На денешен ден, на 7 февруари 1944 година, одбележуваме 81 години од убиството на народниот херој Христијан Тодоровски – Карпош.
Христијан Тодоровски – Карпош е роден во Куманово, на 3 септември 1921 година. Тој е Македонец, бил комунист, истакнат македонски партизан во Народно-ослободителната војна на Македонија во Втората светска војна.
Како ученик станал член на СКОЈ уште од 1939 година. Поради неговите прогресивни идеи, бил избркан од средното училиште и не му било допуштено да се запише во било кое друго средно училиште во тогашното Кралство Југославија.
Во 1941 година учествува во прибирање на оружје, растурање на памфлети и дистрибуција на билтенот “Дедо Иван“, кој бил издаван од страна на градската партизанска организација.
Се истакнал како организатор на Народно-ослободителната антифашистичка војска на Македонија.
Бил член на Козјачкиот партизански одред од 12 октомври 1941 година и член на партизанскиот штаб од Куманово. Откако одредот бил разбиен, преминал во Вториот јужно-моравски одред и Кукавичкиот одред, наизменично 1942-1943 година.
На 26 јуни 1943 година станал командант на Кумановскиот партизански одред, кoj пoстeпeнo нараснал и на 1 декември 1943 година бил официјално преименуван во Прв кумановски баталјон “Јордан Николов – Орце“.
Бил убиен од страна на бугарскиот фашистички окупатор на 7 февруари 1944 година, за време на нападот на бугарското воено и полициско упориште во селото Билјача, Прешевско.
Во негова чест се испеани неколку партизански песни: “Битка се бие кумановско поле“, “Давај ме, мила мамо, давај ме“, “Горо ле, горо зелена“ и “Марш на Трета македонска бригада“.
