Индустрискиот промет во јули 2025 година е зголемен за 13,8 проценти во однос на истиот месец лани, покажуваат податоците на Државниот завод за статистика.
Анализирано според главните индустриски групи, раст е забележан кај интермедијарните производи (освен енергија) за 2,6 проценти, кај капиталните производи за значителни 36,4 проценти, кај трајните производи за широка потрошувачка за 7,2 проценти и кај нетрајните производи за широка потрошувачка за 2,6 проценти.
Во однос на претходниот месец, јуни 2025, прометот бележи пад од 0,7 проценти, но во периодот јануари – јули 2025 во споредба со истиот период во 2024 година е евидентиран пораст од 8,1 процент.
Прометот на домашниот пазар во јули годинава, во споредба со јули 2024, е зголемен за 3,4 проценти, но на кумулативно ниво, од јануари до јули, бележи пад од 1,3 проценти.
Од друга страна, на странските пазари е забележан значителен раст: во јули 2025 година за 17,4 проценти во однос на истиот месец лани, а во првите седум месеци од годината зголемување од 10,3 проценти.
