Денеска е последниот ден за пријавување на болните и немоќни лица кои сакаат да гласаат на Локалните избори 2025, кои ќе се одржат на 19 октомври. Исто така, на 14 октомври истекува рокот за пријавување на лицата под мерка куќен притвор. Според Роковникот на Државната изборна комисија, избирачите кои не можат да гласаат на редовното гласачко место, а се немоќни или болни, треба да ја известат Општинската изборна комисија најдоцна до 10 октомври на полноќ. За да им се овозможи гласање во домашни услови, потребно е да се достави соодветна медицинска документација.
Немоќните и болни лица, како и оние во куќен притвор, затворениците и лицата во старските домови, ќе гласаат на 18 октомври, еден ден пред официјалниот ден на изборите. Избирачките одбори ќе ги посетат домовите на овие лица за да го спроведат гласањето. Вкупниот број на запишани гласачи во Избирачкиот список за локалните избори 2025 година изнесува 1.832.415. Од нив, 1.717.803 се запишани во редовниот Избирачки список, додека 112.000 гласачи се во посебниот Избирачки список за лица на привремена работа или престој во странство. Исто така, 2.162 гласачи се на издржување казна затвор или се во притвор, а 450 гласачи се од домовите за стари лица. Важно е да се напомене дека на овие избори не се спроведува гласање во дијаспората.
