Сообраќајот на патниот правец Скопје – Штип е целосно во прекин поради опожарување на тешко моторно возило (ТМВ), информираат од АМСМ.
Инцидентот се случил околу 23:31 часот, на околу четири километри пред патарината „Преод“, каде што товарното возило било зафатено од пожар. Поради безбедносни причини, сообраќајот на оваа делница е целосно запрен, а возачите се повикуваат да користат алтернативни правци.
Во останатиот дел од државната патна мрежа, сообраќајот се одвива по претежно суви коловози, а интензитетот надвор од градските средини е умерен. На граничните премини, од македонска страна, нема подолги задржувања за влез и излез од државата.
Од АМСМ потсетуваат дека од 15 ноември 2025 година до 15 март 2026 година важи законската обврска за задолжително поседување на зимска опрема во возилата, без разлика на временските услови.
Апелираат на внимателно управување со возилата и прилагодување на брзината, особено на патиштата низ котлините, клисурите и речните долини, каде што постои можност од појава на одрони. Зголемена внимателност се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.
Во сила е и сезонската забрана за сообраќај на патниот правец Охрид – Ресен преку Националниот парк Галичица, кој ќе биде затворен за сите видови возила до 31 март 2026 година.
Дополнително, на повеќе патни правци низ државата се одвиваат градежни работи со времен изменет режим на сообраќај, меѓу кои и на делници од Коридор 10, скопската обиколница и патот Гостивар – Стража, каде што сообраќајот се регулира со семафори или рачна сигнализација.
Од надлежните служби најавуваат навремено информирање за повторно воспоставување на сообраќајот на патот Скопје – Штип.
