Во септември, германските власти регистрирале околу 45.500 нови електрични автомобили, што е за една третина повеќе во споредба со истиот месец минатата година. Скоро секој петти нов автомобил бил електричен. Сепак, и покрај наизглед импресивните бројки, германскиот пазар на електрични возила се соочува со стагнација. “Импресивните стапки на раст не би требало да ја сокријат реалноста дека продажбата е значително под оригиналните проекции”, изјави Константин Гал од консултантската фирма EY.
Растот во продажбата пред се е резултат на минатогодишниот колапс на германскиот пазар на електрични автомобили. Вкупно, регистрирани се 235.500 нови автомобили, што е 12,8 проценти повеќе во однос на минатата година. Меѓутоа, ако се погледне пошироката слика, продажбата опаѓа, бидејќи во првите девет месеци од оваа година продадени се 0,3 проценти помалку возила во однос на првите три квартали од 2024 година. “Растот во септември не е почеток на преокрет”, оцени Гал.
“Економската ситуација во Германија и натаму е мизерна, со огромни структурни проблеми и лошо економско и потрошувачко расположение.” Според неговите проценки, продажбата оваа година ќе биде на ниво на минатата година, односно повеќе од 20 проценти послаба во споредба со 2019 година. Третина од сите нови автомобили биле SUV-ови, кои остануваат најважниот сегмент на домашниот пазар.
