Просечната месечна исплатена нето-плата по вработен во јули 2025 година изнесувала 45 276 денари, додека просечната бруто-плата достигнала 68 102 денари, покажуваат податоците на Државниот завод за статистика.
Во однос на истиот месец лани, платите се зголемени за над 10 отсто – нето-платата е повисока за 10,5 проценти, а бруто-платата за 10,6 проценти.
Зголемувањето се должи пред сè на растот на платите во одредени сектори. Кај бруто-платата, најголем пораст е забележан во административните и помошните услужни дејности за 16,7 проценти, во образованието за 15,1 проценти и во здравствената и социјалната заштита за 15,1 проценти. Сличен тренд е видлив и кај нето-платата, со раст во административните и помошните услужни дејности за 16,5 проценти, во образованието за 15 проценти и во здравството и социјалната заштита за 14,8 проценти.
Сепак, не сите сектори бележат раст. Намалување на просечната месечна плата во однос на претходниот месец е забележано во финансиските дејности и осигурувањето (бруто -3,4 %, нето -4 %), рударството и вадењето на камен (бруто и нето -3,3 %) и во секторот информации и комуникации (бруто -2,4 %, нето -3 %).
Според аналитичарите, трендот на раст на платите укажува на притисок за усогласување со трошоците за живот, но и на раст на платите во јавниот сектор, каде што најмногу се забележува зголемување.
