Москва, 17 март 2024 (МИА) – Владимир Путин освоил околу 87 отсто од гласовите на претседателските избори во Русија, покажаа излезните анкети и првите официјални резултати, што ќе му овозможи уште еден шестгодишен мандат како шеф на државата.
Според Централната изборна комисија, по преброени 50 отсто од гласачите ливчиња, Путин осбоил 87,34 отсто од гласовите. Рускиот центар за истражување на јавното мислење (ВЦИОМ) исто така објави дека Путин добил над 87 отсто.
Неговите проитвкандидати – Николај Харитонов од Комунистичката партија има 3,8 отсто од гласовите, Владислав Даванков од партијата „Нови луѓе“ 3,73, а Леонид Слуцки од Либерално-демократската партија 2,96 отсто.
Вкупната излезност на претседателските избори во Русија е 74,22%. Одѕивот на гласачите во Москва била околу 66 отсто.
Резултатот на Путин е рекорд во историјата на модерна Русија. Во 2018 година, тој освои 76,69%, а во 2012 година – 63,6%. Дмитриј Медведев победи во 2008 година со добиени 70,28% од гласовите. Во 2004 и 2000 година Путин победи со 71,31% и 52,9%. Во 1996 година, пак, Борис Елцин победи во вториот круг со освоени 53,82% од глаовите на рускиот електорат.
Гласањето во Русија траеше три дена, а гласачите можеа да изберат дали ќе гласаат на традиционален начин, користејќи хартиени гласачки ливчиња или електронски преку терминали за гласање. Можноста за електронско гласање на овие избори ја искористиле осум милиони Руси.
Ова се први претседателски избори на кои гласаа и жителите на четирите украински региони – регионите Доњецк, Луганск, Запорожје и Херсон, кои беа анектирани од Русија во септември 2022 година.
Според руски извори, во окупираните делови на украинските региони Доњецк, Луганск, Запорожје и Херсон можеа да гласаат вкупно околу 4,5 милиони луѓе. На изборите гласаа и жителите на црноморскиот полуостров Крим, кој Москва го анектираше во 2014 година.
Податоците на Централната изборна комисија, покажуваат дека Путин убедливо води и во окупираните украински региони.
Украина го оцени гласањето на окупираните територии како кршење на меѓународното право, и го повика светот да не ги признава изборните резултати. Изборите во анектираните украински делови ги осудија и генералниот секретар на ОН Антони Гутереш и повеќе западни државници.
Претседателските избори ги набљудуваат делегации од 36 земји и пет меѓународни организации, а акредитирани се повеќе од 200 парламентарни набљудувачи и неколку десетици експерти за изборниот процес.
Во Русија право на глас имаат околу 110 милиони граѓани. Конечните резултати од претседателските избори треба да бидат објавени најдоцна до 28 март.
Од Сашо Арсовски Извор: МИА
