На локалните избори 2025 година, Македонија доби јасен политички сигнал: довербата на граѓаните во традиционалните партии се намалува, а бројот на неважечки ливчиња расте побрзо од кој било партиски резултат.
ВМРО-ДПМНЕ и коалицијата околу неа повторно излегоа како најсилна политичка опција, освојувајќи 34% од гласовите. Сепак, тоа е пад од околу 9,4 процентни поени во однос на парламентарните избори од 2024 година, кога имаа 43,4%.
Во апсолутни бројки, партијата доби 301.720 гласа, што е околу 135.000 помалку отколку на минатогодишните парламентарни избори.
И покрај падот, резултатот е за околу 10.000 гласови подобар од оној на локалните избори во 2021 година.
За СДСМ, изборите потврдија дека кризата во поддршката е длабока и долготрајна. Партијата освои 14,2% од гласовите, што е помалку и од 2024 (15,4%), и драстично помалку од 2021 година, кога имаше 25,5%.
Со 125.758 гласа, социјалдемократите бележат пад од над 30.000 гласа во однос на минатата година и над 110.000 гласа помалку во споредба со локалните избори во 2021 година.
Коалицијата ДУИ – НАИ освои 12,9% од гласовите, што е за неполн процентен поен помалку од лани, но за 1,8 процентни поени повеќе во однос на 2021 година.
Во апсолутни бројки, тоа се 114.246 гласа — околу 23.000 помалку од парламентарните избори, но 11.000 повеќе од претходните локални.
Новата платформа ВЛЕН (Вреди) доби 91.974 гласа, односно 10,4%, што е намалување од 15.000 гласа споредено со 2024 година.
Левица доби 57.041 глас, или 6,3% од вкупните гласови, што е пад од 0,3 процентни поени во однос на 2024 година, но раст од 1,1 процентен поен во споредба со 2021 година.
ЗНАМ на Максим Димитриевски освои 38.392 гласа (4,3%), што е пад од 18.000 гласа и околу 1,1 процентен поен помалку од лани.
Коалицијата „Искуство за успех“ предводена од ЛДП има 13.096 гласа (1,5%).
Најзагрижувачкиот тренд доаѓа од категоријата неважечки ливчиња, кои стануваат симбол на растечка апатија и протестно гласање.
Во 2021 година имало 19.127 неважечки ливчиња (2,1%)
Во 2024 година бројката се зголемила на 27.451 (2,7%)
Во 2025 година – 50.007 неважечки ливчиња (5,7%)
Тоа значи дека неважечките ливчиња би биле шеста политичка сила во земјата, веднаш зад Левица, а пред ЗНАМ.
Иако секоја поголема партија синоќа се прогласи за победник, бројките откриваат поинаква слика – доминација на апатијата, раст на празното гласање и сè поголем јаз меѓу партиите и граѓаните.
Единствениот политичар што отворено призна пораз беше Бујар Османи, кој честиташе на противникот во Чаир и најави дека ќе ја преиспита својата политичка иднина.
Резултатите од локалните избори 2025 не се само статистика – тие се огледало на општественото расположение.
ВМРО-ДПМНЕ ја задржа првата позиција, СДСМ продолжи да тоне, албанскиот блок се прегрупира, а Левица и ЗНАМ ја бараат својата ниша.
Но најсилната порака до политичките елити дојде од гласачите кои одбраа – да не изберат никого.
