Москва, 7 мај 2025 (МИА) – Претседателот на Русија и на Венецуела, Владимир Путин и Николас Мадуро денеска во Москва потпишаа Договор за стратешко партнерство.
Мадуро истака дека тоа е најдобриот момент во односите со Русија во изминатите 80 години и вети „нов импулс“ и унапредување на соработката во сите области.
– Имаме ветувачки области за соработка … енергетика, транспорт, фармацевтска индустрија, логистика, здравствена заштита и, се разбира, хуманитарна помош. Генерално, задоволни сме од начинот на кој се развиваат нашите контакти, посочи Путин.
Мадуро е еден од сојузниците на Путин и на 9 мај ќе присуствува на воената парада во Москва по повод 80-годишнината од победата над нацистичка Германија.
Односите помеѓу Москва и Каракас се подобрија за време на мандатот на поранешниот венецуелски претседател Уго Чавез (1999-2013) и продолжија да се унапредуваат со Мадуро, кој ја поддржува Русија и пред и по инвазијата врз Украина.
Голем број држави не го признаваат реизборот на Мадуро во јули 2024 година.
Од Марина Илиевска Извор МИА
