Претседателот на Србија, Александар Вучиќ, објави дека САД ќе ги воведат санкциите против српската нафтена компанија НИС од 1 октомври. Вучиќ истакна дека одложувањето на санкциите е само за четири дена, што е очекувано, но не и добра вест. Тој нагласи дека Србија ќе направи сѐ што може за да ги заштити своите граѓани во услови на новите ограничувања.
„Се соочуваме со колатерална штета во односите помеѓу САД и Русија, а цената што ќе ја платиме ќе биде висока“, рече Вучиќ. Тој потсети дека Русите се мнозински сопственици на НИС и дека ситуацијата ќе стане уште потешка, бидејќи банките нема да сакаат да работат со компанијата по воведувањето на санкциите.
Претседателот изрази загриженост за исплатата на платите и за општата финансиска стабилност на компанијата. „Можеби ќе се случи некое чудо пред 1 октомври, но во моментов се соочуваме со тешки времиња и неизвесна зима“, додаде Вучиќ. Тој увери дека државата ќе се труди да им обезбеди на граѓаните топла зима и да ги ублажи последиците од санкциите.
Санкциите против НИС досега се одложувани шест пати, а последното одложување беше до 26 септември. На маргините на собирот во Њујорк, Вучиќ имаше важни средби со светски државници, но предизвиците со кои се соочува Србија остануваат значајни.
