Во италијанскиот град Перуџа, хаосот се шири по бруталната пресметка меѓу две групи иселеници – Македонци и Албанци. Инцидентот, кој се случи во барот во областа Сан Систо, прерасна во масовна тепачка, оставувајќи неколку повредени и 11 лица зад решетки. Според првичните информации, конфликтот не бил однапред планиран, туку ескалирал поради банална причина – фотографија направена со мобилен телефон.
Вербалната расправија меѓу младите лица многу брзо прераснала во насилство, во кое се користеле столици, маси и дрвени палки долги над 60 сантиметри. Инцидентот вклучувал и неколку романски државјани, а ситуацијата дополнително се влошила кога двајца од учесниците, во обид да побегнат со автомобил, удриле 27-годишен македонски државјанин, кој сега се наоѓа во болница со тешки повреди на двете нозе.
Повредениот е хоспитализиран во Перуџа, а лекарите најавуваат долг период на лекување од најмалку 30 дена. Полицијата продолжува со потрагата по возачот и неговиот сопатник, меѓу кои има и малолетник. По пријавата на итниот број 112, на местото на настанот интервенирале голем број припадници на карабиниерите и италијанската полиција. Уапсените лица, на возраст од 19 до 31 година, вклучуваат и неколку кои веќе биле познати на органите на редот. При извршените претреси, кај еден од приведените пронајдена е дрога, а друг се обидел да ги сокрие клучевите од автомобилот во саксија, во обид да избегне заплената. Сите уапсени се префрлени во затворот „Капане“ и ќе одговараат за тешко насилство.
