Градоначалникот на Скопје, Орце Ѓорѓиевски, со задоволство објави преку социјалните мрежи дека денеска ја потпишал одлуката за започнување на јавната набавка за изградба на првата фаза од подземната сообраќајница на булевар „Македонија“. Оваа важна инфраструктурна инвестиција ќе се реализира на потегот од под „Лимак“ до влезот на Кисела Вода. „По завршувањето на правната постапка, веднаш започнуваме со работа! Ова е проект што претставува вистински пресврт за централното градско подрачје“, истакна Ѓорѓиевски.
Според градоначалникот, изградбата на подземната сообраќајница ќе помогне во намалувањето на сообраќајниот метеж и ќе внесе нова динамика во центарот на градот. Планирани се и дополнителни фази, вклучувајќи изградба на кружен тек кај „Нова Македонија“ и два кружни тека на булевар „Кочо Рацин“ и улица „Железничка“. „Овие решенија ќе овозможат побезбеден и побрз проток, со паметни и современи решенија согласно европските стандарди“, додаде тој.
Со пуштањето во употреба на подземната сообраќајница, Скопје ќе добие свое прво подземно сообраќајно решение, што е значаен чекор напред за градот. „Сообраќајницата ќе има шест ленти – четири за двосмерен автомобилски сообраќај, две за јавен превоз и дополнителни пешачки патеки. Ова значи дека сообраќајот ќе се одвива непречено, а центарот на градот ќе се ослободи од гужвите“, нагласи Ѓорѓиевски. Тој го опиша проектот како „симбол на новото време за Скопје“ и најави дека „преродбата на Скопје – започнува!”
