Полициски службеници од ОВР Кратово го лишиле од слобода 38-годишниот С.С. од селото Татомир, откако било утврдено дека управувал возило под силно дејство на алкохол и излетал од коловозот.
Инцидентот се случил на 26 јануари 2026 година околу 22:45 часот, на регионалниот пат Татомир – Кратово, во атарот на селото Туралево, кога возачот изгубил контрола и излетал од патот.
По извршените проверки, полицијата констатирала дека возачот бил под дејство на алкохол, при што му биле измерени дури 3,19 промили алкохол во крвта, што претставува сериозно загрозување на безбедноста во сообраќајот.
Возачот бил приведен во 23:07 часот, а по целосно документирање на случајот против него ќе биде поднесена кривична пријава по член 297-а од Кривичниот законик, за делото „безобѕирно управување со моторно возило“.
Од полицијата апелираат до возачите да не управуваат возило под дејство на алкохол, потенцирајќи дека ваквите случаи претставуваат директна опасност за сите учесници во сообраќајот.
