Денеска во Собранието е закажана седница на која единствена точка на дневен ред се измените на Изборниот законик по скратена постапка. Овие измени ќе донесат значајни промени во начинот на учество на независните кандидати на претстојните локални избори.
Главната новина е намалувањето на бројот на потребни потписи за поднесување листи од група избирачи. Наместо досегашниот еден отсто, сега ќе биде потребно да се соберат најмалку 0,95% од запишаните избирачи во изборната единица. За гласачите што живеат во странство, условот е собирање најмалку 1.000 потписи пред службените лица во дипломатските и конзуларните претставништва.
Покрај ова, со измените се дефинираат и интернет порталите согласно Законот за медиуми, а се прави и усогласување со Законот за организација и работа на органите на државната управа. Целта на предлог-законот е да обезбеди појасен, транспарентен и инклузивен изборен процес, како и да се отстранат воочените недоследности во изборната процедура.
Во меѓувреме, на неодамнешната седница, Државната изборна комисија (ДИК) донесе одлука да го стави вон сила упатството за собирање потписи од 2024 година. Ова следува по одлуката на Уставниот суд кој ги укина членови 61 и 62 од Изборниот законик, каде беше регулиран бројот и процентот на потписи потребни за предлагање листи од групи избирачи.
Претседателот на ДИК, Борис Кондарко, истакна дека овие измени ќе ја зајакнат правната рамка и ќе овозможат демократски и фер изборен процес.
