Купувачите на нови автомобили во САД во 2025 година се малку позадоволни од своите возила во споредба со претходната година, покажува најновото издание на истражувањето Initial Quality Study на J.D. Power. Но, никој не е посреќен од сопствениците на Lexus и Nissan, кои се најдоа на врвот во своите категории – Lexus кај премиум брендовите, а Nissan кај брендовите за пошироката публика.
Во истражувањето се вклучени над 92.000 сопственици и корисници на лизинг, кои ги оценувале своите возила во првите три месеци од користењето. Секој учесник одговорил на 227 прашања во 10 категории, кои ги опфаќаат: инфозабавни системи, седишта, клима-уреди, надворешност, погони и целокупниот возачки впечаток.
Според Jutarnji.hr, индустрискиот просек во 2025 изнесува 192 проблеми на 100 возила, што е благо подобрување во однос на 194 во 2024 година. Кај премиум брендовите напредокот е уште повпечатлив: од 230 на 203 проблеми, при што се истакнува Tesla како бренд кој најмногу придонел кон напредокот.
Врвот и дното на листата:
- Lexus – 166 проблеми на 100 возила
- Nissan – 169
- Hyundai – 173
- Jaguar – 175
- Chevrolet – 178
На дното се најдоа:
- Rivian – 274
- Audi – 269
- Volvo – 258
- Tesla – 200 (напредок, но сè уште под просекот)
Најдобри модели по класи:
Како и секоја година, J.D. Power објави и победници по класи.
Porsche 911 е најдобро рангираното возило со само 116 пријавени проблеми на 100 возила, што го прави најквалитетниот модел во 2025.
Меѓу другите истакнати:
- Nissan Sentra – најдобар меѓу компакт автомобилите
- Buick Encore GX, Acura RDX и Chevrolet Blazer – најдобро оценети SUV модели
Главни проблеми: Инфозабава и… држачи за чаши?
Најголемиот извор на незадоволство и понатаму се инфозабавните системи, на кои се однесува речиси половина од сите пријавени проблеми. Корисниците се жалат на сложени менија дури и за едноставни функции како подесување на климата или отворање на преградата за ракавици.
Според Френк Хенли од J.D. Power, „визуелно атрактивните екрани на допир сè почесто создаваат нелагодност при секојдневно користење“, и затоа препорачува враќање на физички копчиња за основни команди.
Интересно, се зголемува бројот на поплаки дури и за – држачите за чаши, кои често не се функционални или се поставени на несоодветни места.
Погони: Хибридите проблематични, бензинците најстабилни
Врз основа на типот на погон:
- Plug-in хибридите имаат најмногу проблеми – 237 на 100 возила
- Електричните возила – 212
- Бензинските мотори остануваат најпоуздани – со 184 проблеми во просек
И тука Tesla имала големо влијание – подобрувањето на нејзиниот квалитет помогнало да се подобри и просекот за електричните возила.
