Кандидатката за градоначалник на Прилеп, Јасминка Стојковска, во своето завршно обраќање пред граѓаните преку медиумите ја претстави својата долгорочна визија за развој на градот, ставајќи акцент на одржлив туризам, културно наследство и меѓународна соработка.
Стојковска нагласи дека Прилеп се соочува со сериозни предизвици – сиромаштија, иселување на младите и недостаток на долгорочна стратегија. „Без визија, ризикуваме Прилеп да ја доживее судбината на многу села кои изумреа“, порача таа, додавајќи дека градот мора да се позиционира како европски и светски центар на автентичност и одржлив развој.
Прилеп – град со светска визија
Во својата програма, Стојковска ја дефинира визијата за Прилеп и Мариово како регион кој обединува историја, природа и човечка топлина, со цел отворање кон нови пазари и соработка со Арапскиот свет, Медитеранот и Скандинавија.
„Македонија нема море, но ја има најубавата рамнотежа на световите – клима, зеленила и душа. Прилеп е повеќе од град – тоа е чувство, енергија и иднина што сака да биде споделена со светот“, изјави Стојковска.
Стратегиски цели: енергија, туризам и млади
Стојковска предлага јасен план во неколку насоки:
- Промоција на Прилеп и Мариово како модел на чиста енергија и одржлив туризам, инспириран од медитерански и скандинавски искуства.
- Привлекување на странски инвестиции преку соработка со амбасади и меѓународни организации.
- Развивање на еко и wellness туризам, уметнички центри и културни траектории.
- Вклучување на младите во истражувачки и образовни програми, преку партнерства со Институтот за тутун и локални универзитети.
Прилеп како еко и wellness дестинација
Во визијата на Стојковска, Прилеп треба да стане центар за природна терапија, здрав живот и медитација, со развој на eco-резиденции и wellness центри во подножјето на планините.
Покрај тоа, се предвидуваат планинарски и велосипедски патеки низ Мариово, параглајдинг од Дервен, како и етно и гастро-тури со локални производи и уметност.
Уметност, култура и одговорност
Стојковска предлага уметнички резиденции, фестивали и изложби на отворено, кои ќе го промовираат Прилеп како креативен град.
Особено внимание посветува на одговорноста на концесионерите во експлоатацијата на природни ресурси, барајќи пошумување и рециклирање на мермерни остатоци во уметнички проекти.
„Кога човекот ја почитува природата – и природата го наградува човекот“, додаде таа.
Културно наследство и идентитет
Програмата предвидува реставрација на Маркови Кули и промоција на тутунот и мермерот како симболи на Прилеп, заедно со создавање етно-села и традиционални занаетчиски центри.
Партнерства и реализација во три фази
Стојковска истакна дека успехот не зависи само од буџетот, туку од стратешко поврзување со државни институции, амбасади и ЕУ фондови.
Реализацијата е планирана во три фази:
- Пилот-проекти – етно-села, Маркови Кули и локални тури;
- Меѓународна промоција и партнерства;
- Развој на wellness центри, фестивали и резиденции.
Повик за промена
„Сите отидоа да градат во Дубаи, но никој нив не ги донесе тука“, рече Стојковска, апелирајќи дека време е светот да инвестира во Македонија и дека Прилеп може да стане пример за модерен, еколошки и духовно богат град.
