Судењето против родителот кој нападна двајца фудбалери на фудбалскиот натпревар на стадионот Бело Брдо во Штип е одложено. На денешната прва главна расправа, обвинетиот побара судски преведувач на албански јазик, како и да му биде доставен обвинителниот акт на албански преку електронски пат. Обвинетиот дополнително поднесе нови докази.
„Денеска од наша страна се побара да се исполнат тие услови, посебно во делот на преводот. Судот прифати и се надеваме дека во една постапка во понатамошниот дел ќе се докаже дека обвинетиот не е виновен за кривичното дело кое му се товари“, изјави адвокатот Алиспахиќ.
Наредното рочиште е закажано за 29 септември, а расправите ќе продолжат и на 2 и 3 октомври. Адвокатот Костадиновиќ истакна дека одбраната побарала одложување на рочиштето поради потребата од превод на обвинителниот акт на албански јазик. Обвинителството, пак, располага со доволно докази за да го потврди делото, кое се однесува на насилство. Одбраната доставила листа на докази, но тие се однесуваат на имотната и здравствената состојба на обвинетиот.
Инцидентот се случи на 24 август 2025 година, за време на натпреварот помеѓу младинските екипи на ФК Брегалница и ФК Шкупи. Родител на фудбалер од ФК Шкупи нападна двајца фудбалери од ФК Брегалница, при што децата се здобија со повреди, констатирани во Клиничката болница во Штип.
