Светскиот македонски конгрес (СМК) со остра реакција по повод одбележувањето на 113-годишнината од битката кај Зебрњак, ја оцени оваа прослава како „чествување на почетокот на српската окупација врз македонскиот народ и Македонија“.
Во своето соопштение, СМК нагласува дека Балканските војни од 1912–1913 година не претставуваат ослободување, туку напротив — окупација и поделба на Македонија меѓу соседните држави Србија, Грција, Бугарија и Албанија.
„Балканските војни за Македонскиот народ и Македонија се окупаторски. Земјите учеснички во нив се окупатори, независно од актуелната геополитика и добрососедските односи“, се наведува во реакцијата на организацијата.
СМК потсетува дека македонскиот народ бил насилно мобилизиран во сите армии — српска, бугарска и грчка — од окупираните делови на Македонија, а со самите војни бил извршен „геноцид врз македонскиот народ“.
Организацијата потсетува и на поделбата на Македонија со Букурешкиот договор од 1913 година, при што, како што наведува,
Грција добила 34.356 км²,
Србија 25.342 км²,
Бугарија 6.798 км²,
а Албанија 1.115 км².
„Со Првата балканска војна не започнува ослободувањето на Македонија, туку нејзината окупација“, се вели во соопштението.
СМК потсетува и дека Србија во 1990 година насилно го забранила македонското чествување на Првото заседание на АСНОМ во манастирот „Свети Отец Прохор Пчињски“, кој, како што нагласуваат, бил „еднострано анектиран од Белград во 1947 година, заедно со областа Гора, Прешево, Бујановец, Медвеѓе и дел од Крива Паланка“.
Организацијата повторува дека, според нејзиниот став, Македонија никогаш не била ослободена од Албанија, Бугарија, Грција и Србија, туку „ослободувањето е дело на македонскиот народ во Втората светска војна, и тоа само во Вардарскиот дел на Македонија“.
На крајот од реакцијата, СМК апелира до Владата на Република Македонија да воспостави јасна политика во однос на чествувањето на настани и личности од историјата на соседните држави.
„Македонската влада треба соодветно да го уреди чествувањето на датуми, настани и личности од соседните држави и народи на територијата на Македонија, кои за македонскиот народ се окупатори, односно окупаторски“, стои во соопштението на Светскиот македонски конгрес.
Со оваа реакција, СМК уште еднаш го потврди својот критички став кон историските наративи на соседите, нагласувајќи дека историјата на Македонија мора да се толкува низ призмата на македонската перспектива и страдање, а не на окупаторските интереси.
